Skirbi pa:
dr. Natacha Jreige
Kiko ta enfermedad di “Fatty Liver”? – Nonalcoholic fatty liver disease, tin biaha yama NAFLD, ta un condicion unda vet ta acomula den e higra. E higra ta un organo grandi den e parti drechi ariba di nos barica. Den caso di NAFLD, vet ta bai den e celnan di e higra, causando inflamacion riba nivel halto y tambe daño na e higra. Si e situacion aki persisti cu tempo e vet den e higra por conduci na cirrhosis.
Tin dos tipo di NAFLD:
- Nonalcoholic fatty liver (tambe yama NAFL) – Cu NAFL, e higra tin acomulacion di vet pero no ta inflama.
- Nonalcoholic steatohepatitis (tambe jama NASH) – Cu NASH, e higra tin acumulacion di vet y e ta inflama.
E articulo aki ta mas tanto over di NASH pasobra esaki ta e condicion cu por trece mas problema.
Personanan cu ta consumi demasiado alcohol por haya un condicion similar na NASH. Sinembargo NASH ta pasa cu personanan cu no ta consumi alcohol of cu ta consumi solamente un tiki alcohol.
Kiko ta causa NASH? – Dokternan no sa e causa exacto di NASH. Nan sa si cu NASH ta pasa mas biaha cu cierto personanan, manera personanan cu:
- Ta sobrepeso
- Tin un condicion cu ta jama diabetes mellitus, cu ta causa cu e nivel di sucu den sanger ta mucho halto
- Tin cholesterol halto
Kiko ta e sintomanan di NASH? – Mayoria di persona cu NASH no tin sintoma.
Bo dokter por sospecha cu bo tin NASH door di e resultado di bo test di sanger rutinario.
Mi lo mester haci mas test? – Si. Si bo dokter ta sospecha cu bo tin NASH, bo lo mas tanto mester:
- Haci mas test di sanger
- Haci un test di imagen di e higra, manera un ultrasound, CT of MRI scan. E testnan aki ta crea potret di parti paden di bo curpa.
Tin persona mester haci un biopsy di e higra. Durante e test aki e dokter ta saca un muestra chikito di e tehido di e higra. Un otro dokter lo analisa e muestra aki bou di un microscoop pa wak si NASH ta presente. Un biopsy di higra ta e unico manera pa bisa sigur si un persona tin NASH. Bo dokter lo haci e test aki si e no ta sigur cu bo tin NASH of tambe pa wak cuanto inflamacion tin na e higra. Si bo test di sanger y imagen di higra sali normal, no tin necesidad pa haci un biopsy di e higra.
Con NASH ta wordo trata? – NASH no ta wordo trata directamente. Pero e condicion por mehora si e otro condicionan medico cu mayoria di biaha ta presenta hunto cu e NASH wordo trata. Por ehempel, baha peso, controla e sucu y cholesterol halto, por yuda mehora e NASH.
Cu esey den mente, bo dokter por:
- Yudabo crea un plan pa baha peso, si bo ta sobrepeso – si bo dokter recomenda pa bo baha peso, ta importante pa haci esaki poco poco. No baha mas cu 1.6 kg pa siman.
- Trata bo sucu halto, si bo tin sucu halto
- Trata bo cholesterol halto, si bo tin cholesterol halto.
Haciendo e cambio nan aki tin beneficion fuera di yuda cu NASH. E cambionan aki tambe ta yuda reduci e chance pa bo haya un atake di curason of stroke. Esey ta importante paso personanan cu NASH hopi biaha tambe ta na riesgo di haya malesa di curason of stroke.
Si bo tin NASH den forma severo, bo dokter por sugeri pa bo tuma vitamina E. Algun estudio ta mustra cu vitamina E por yuda reduci parti di e daño na e higra causa door di NASH. No tuma vitamin E si bo dokter of nurse no a recomendabo esaki.
NASH ta bira pio cu tempo? – NASH usualmente no ta bira pio cu tempo. Tin biaha si e por conduci na pone e higra haya cirrhosis. Cirrhosis por causa diferente sintomanan, manera hinchamento di pia, dificultad pa hala rosea of sensacion di cansancio. Si bo haya cirrhosis, bo dokter lo papia cubo over di e posibel tratamentonan.
Mi mester keda bai dokter? – Si, personanan cu NASH mester keda bai dokter pa check regular. Bo dokter lo haci testnan riba base regular, cual mayoria di biaha ta inclui test di sanger.
